Mjólkursamsalan – önnur umferð leikin á Korpu á miðvikudag


17.07.2017
Eldri kylfingar

Önnur umferð í Mjólkursamsalan - mótaröð eldri kylfinga verður leikin á Korpu næsta miðvikudag, 19. júlí. Þriðja umferðin fer framí næstu viku og verður einnig leikin á Korpu. Bætt hefur verið við aukaumferð þriðjudaginn 1. ágúst og mun sá leikur fara fram í Grafarholti.

Mót sumarsins verða því fimm talsins en ekki fjögur eins og upphaflega var áætlað. Þrír bestu hringirnir telja til verðlauna á mótaröðinni, þannig að í höggleiknum telja 3 bestu skorin í höggum talið og í punktakeppni telja samanlagt þrír punktahæstu hringirnir. Keppendur þurfa því að taka þátt og skila inn skori í að minnsta kosti þremur mótum af fjórum til þess að vinna til verðlauna.  Veitt verða verðlaun fyrir þrjú efstu sætin í punktakeppni og höggleik í báðum flokkum karla og kvenna.  Skipting í flokka kemur fram hér að neðan. Sami keppandinn getur ekki unnið til verðlauna fyrir bæði punktakeppni og höggleik.

Verði keppendur í verðlaunasætum jafnir að höggum eða punktum ræðst röð af fjölda mótasigra á mótaröðinni. Sé það jafnt ræður besta skor, síðan næst besta og svo koll af kolli þar til röð keppenda í verðlaunasæti liggur fyrir.

Þrír fyrstu hringirnir í höggleiknum á mótaröðinni verða hafðir til hliðsjónar við val kvennasveita GR fyrir sveitakeppnina og er vísað til reglugerðar um sveitakeppni til nánari skýringa.

Dagsetningar mótanna eru því á eftirtaldar: 
  • Korpúlfsstaðavöllur 20. júní
  • Korpúlfsstaðir 19. júlí
  • Korpúlfsstaðavöllur 25. júlí
  • Grafarholtsvöllur, 1. ágúst
  • Grafarholtsvöllur 3. september
    
Hvert mót fyrir sig verður auglýst á heimasíðu klúbbsins. Eftir að síðasta umferðin hefur verið leikin fer fram lokahóf fyrir þátttakendur á Korpúlfsstöðum. Dagsetning fyrir hófið og fyrirkomulag verður kynnt þegar nær dregur.

Skipting flokka í mótaröðinni verður sem hér segir:
  • Kvennaflokkur: 50-64 ára – Rauðir teigar
  • Kvennaflokkur: 65 og eldri – Rauðir teigar
  • Karlaflokkur: 50-69 ára – Gulir teigar
  • Karlaflokkur: 70 ára og eldri – Rauðir teigar

Þátttakendur verða að bóka sína rástíma sjálfir og það má vera hvenær sem er á viðkomandi leikdegi. Mótsgjald er 1.500 kr. sem greiða þarf í golfbúðinni áður en leikur hefst á þeim velli sem spilað er á hverju sinni. Að leik loknum skila menn svo inn skorkorti með kennitölu og undirskrift frá meðspilara í þar til gerðan kassa sem staðsettur verður í golfbúðinni.

Tilboð verður í veitingasölu fyrir keppendur þá daga sem mótin verða haldin bæði á Korpúlfsstöðum og í Grafarholti.

Mótsstjóri mótaraðarinnar er Atli Þór Þorvaldsson. 

Nefnd eldri kylfinga
  

« Til baka

Styrktaraðilar GR