Silfurnesvöllur á Hornafirði verður áfram vinavöllur GR

Silfurnesvöllur á Hornafirði verður áfram vinavöllur GR

Fimmti vinavöllur GR á komandi tímabili er Silfurnesvöllur hjá Golfklúbbi Hornafjarðar. Þeir fjórir vinavellir sem þegar hafa verið kynntir eru Kirkjubólsvöllur (GSG), Hlíðarendavöllur (GSS), Svarfhólsvöllur (GOS) og Gufudalsvöllur (GHG).

Silfurnesvöllur er í landi Hafnarhrepps á ræktuðum löndum, meðal annars á Silfurnesi, sem nafn vallarins er dregið af. Lega Silfurnesvallar er sérlega heillandi og býður upp á mikla möguleika til fjölbreytts golfleiks. Í fyrstu var völlurinn 6 holur en var fljótlega breytt í 9 holu völl, með velvilja Hafnahrepps og þeirra sem þarna áttu lönd. Nýr og breyttur völlur Golfklúbbs Hornafjarðar var formlega vígður þann 17. ágúst 2006.

Árið 1981 hóf klúbburinn byggingu á 150 m2 golfskála og var það Árni Kjartansson arkitekt sem teiknaði skálann. Árið 2016 var byggð við golfskálann ný 85 fermetra vélageymsla sem gjörbreytir allri umhirðu og umgengni við tæki og tól klúbbsins.

Félagsmenn GR njóta sömu kjara og á síðasta ári og greiða kr. 3.000 í hvert sinn sem þeir leika á vellinum, ef hjón spila saman greiða þau kr. 4.500 og skiptir þá ekki máli hvort leiknar séu 9 eða 18 holur. Áður en leikur hefst skulu félagar staðfesta félagsaðild í afgreiðslu og ganga frá greiðslu vallargjalds. Samkomulagið gildir ekki ef félagsmenn leika með hópum sem gert hafa sérstaka samninga um afslætti, sbr. fyrirtækjamót.

Allar upplýsingar um vinavelli félagsins er að finna á undirsíðunni Vinavellir

Miðað við fréttir vikunnar þá er ekki útlit fyrir mörg ferðalög erlendis á komandi sumri og ættu félagsmenn að geta nýtt sér vinavallasamning við Golfklúbb Hornafjarðar og aðra vinavelli félagsins á leið sinni um landið í sumar.

Góða helgi!
Golfklúbbur Reykjavíkur

Til baka í yfirlit