Silfurnesvöllur er níundi vinavöllur GR árið 2022

Það er ánægjulegt að tilkynna félagsmönnum að Silfurnesvöllur hjá Golfklúbbi Hornafjarðar verður áfram vinavöllur GR á komandi tímabili, þriðja árið í röð.

Silfurnesvöllur er í landi Hafnarhrepps á ræktuðum löndum, meðal annars á Silfurnesi, sem nafn vallarins er dregið af. Lega Silfurnesvallar er sérlega heillandi og býður upp á mikla möguleika til fjölbreytts golfleiks. Í fyrstu var völlurinn 6 holur en var fljótlega breytt í 9 holu völl, með velvilja Hafnahrepps og þeirra sem þarna áttu lönd. Nýr og breyttur völlur Golfklúbbs Hornafjarðar var formlega vígður þann 17. ágúst 2006.

Árið 1981 hóf klúbburinn byggingu á 150 m2 golfskála og var það Árni Kjartansson arkitekt sem teiknaði skálann. Árið 2016 var byggð við golfskálann ný 85 fermetra vélageymsla sem gjörbreytir allri umhirðu og umgengni við tæki og tól klúbbsins.

Félagsmenn GR njóta áfram sömu kjara og greiða kr. 3.000 í hvert sinn sem þeir leika á vellinum, ef hjón spila saman greiða þau kr. 5.000 og skiptir þá ekki máli hvort leiknar séu 9 eða 18 holur. Áður en leikur hefst skulu félagar staðfesta félagsaðild í afgreiðslu og ganga frá greiðslu vallargjalds. Samkomulagið gildir ekki ef félagsmenn leika með hópum sem gert hafa sérstaka samninga um afslætti, sbr. fyrirtækjamót.

Vinavellir GR eru nú orðnir níu fyrir golfsumarið 2022 og er allar upplýsingar um þá að finna á hér á vefnum undir Golfvellir – Vinavellir

Góða helgi!
Golfklúbbur Reykjavíkur