FootJoy bikarinn fer af stað enn eitt árið

Mercedes-Benz bikarinn er styrktur af bílaumboðinu Öskju og leggur til frítt árgjald á næsta ári fyrir sigurvegarann. Annað sætið gefur hálft árgjald. Um er að ræða holukeppni með forgjöf þar sem leiknar eru 18 holur. Um bikarkeppni er að ræða þannig að keppendum fækkar um helming í hverri umferð. Tveir leikir eru leiknir saman í holli. Fyrsta umferðin verður leikinn sunnudaginn 21. júní. Það er gert ráð fyrir allt að 64 keppendum í þeirri umferð og það verða þá 32 sem mæta til leiks sunnudaginn 28. Júní. Fyrsti ráshópurinn byrjar kl. 16:04 og ræst verður út til 18:12. Í annari umferð er ræst út frá 16:04 – 17:04 en þá eru 8 holl, tveir holukeppnisleikir í holli og 32 keppendur. Sextán manna úrslit verða eftir meistaramót og mótinu lýkur í ágúst. Skráning í Mercedes Benz bikarinn 2026

Arkea Montauban Ladies Open mótinu á LET Access mótaröðinni lauk í dag. Mótið var það þriðja á LET Access mótaröðinni í sumar, en þar keppti Ragnhildur Kristinsdóttir ásamt þeim Hulda Clöru Gestsdóttur og Andreu Bergsdóttur. Hér má sjá úrslit mótsins Ragnhildur Kristinsdóttir endaði jöfn í ellefta sæti mótsins á einu höggi undir pari ásamt Andreu Bergsdóttur. Ragnhildur lék hringi mótsins á 73, 69 og 73 höggum. Hún hefur byrjað tímabilið af krafti og náð í gegnum niðurskurð í öllum þremur mótunum. Fyrir mótið var Ragnhildur fjórða á stigalista mótaraðarinnar og heldur hún því sæti sínu sem einn af efstu kylfingum listans. Hringi Ragnhildar má sjá í myndasafninu hér fyrir neðan.

Hjóna- og parakeppni Golfklúbbs Reykjavíkur verður haldin í Grafarholti miðvikudaginn 17. júní. Mótið er innanfélagsmót. Keppnisfyrirkomulag Leikið verður samkvæmt Greensome -fyrirkomulagi þar sem tveir kylfingar mynda lið. Við útreikning liðsforgjafar fær liðið: 60% af leikforgjöf kylfings með lægri forgjöf 40% af leikforgjöf kylfings með hærri forgjöf Hámarksforgjöf: Karlar: 24 Konur: 28 Ræsing Ræst verður út samtímis af öllum teigum kl. 09:00 . Kylfingar eru vinsamlegast beðnir um að mæta tímanlega svo allir komist á sinn rásteig fyrir ræsingu. Verðlaun Glæsileg verðlaun verða veitt fyrir þrjú efstu sætin auk nándarverðlauna á öllum par 3 holum vallarins. Skráning Skráning hefst í mótaskrá Golfbox þriðjudaginn 9. júní kl. 13:00 . Mótsgjald Mótsgjald er 9.500 kr. á mann og greiðist inn á reikning hjá veitingasala. Athugið að skráning telst ekki gild fyrr en greiðsla hefur borist. Upplýsingar um reikning: Reikningsnúmer: 0133-15-380680 Kennitala: 650913-0270 Reikningshafi: Vagninn 1935 ehf. Innifalið í mótsgjaldi eru veitingar að móti loknu. Matseðill Forréttur Þrjár tegundir af tapas-snittum: Hráskinka Reyktur lax Skampi-rækjur Aðalréttur Heilsteikt nautalund með: Béarnaisesósu Bátakartöflum Grænmetisvendi Sellerírótarmauki Eftirréttur Konfekt og kaffi Pylsupartý! Byrjað verður að afgreiða pylsur um það bil 1½ klukkustund eftir að golfið hefst . Hæ hó, jibbí jei – það styttist í Hjóna- og parakeppnina! Golfklúbbur Reykjavíkur ⛳🏌️‍♀️🏌️‍♂️

Dagbjartur Sigurbrandsson, GR, og Gunnlaugur Árni Sveinsson, GKG, hefja í dag leik í lokaúrtökumóti fyrir U.S. Open á The Lakes Golf & Country Club vellinum í Westerville, Ohio. Lokaúrtökumót U.S. Open er síðasta stigið í átt að þátttöku í einu af fjórum risamótum golfsins. Þar leika kylfingar 36 holur á einum degi, og aðeins þeir efstu tryggja sér sæti á sjálfu U.S. Open mótinu. Tíu úrtökumót fara fram í Bandaríkjunum og Kanada í dag og má þar finna marga kylfinga frá PGA mótaröðinni, aðra atvinnukylfinga sem og fremstu áhugakylfinga heims. Dagbjartur tryggði sér sæti í lokaúrtökumótinu eftir frábæra spilamennsku í undankeppni í Pittsfield . Þar léku 85 kylfingar um fjögur laus sæti í lokaúrtökumótinu. Dagbjartur endaði jafn í öðru sæti undankeppninnar, en þetta er annað árið í röð sem Íslandsmeistarinn spilar sig inn í lokaúrtökumótið. Gunnlaugur Árni þurfti ekki að spila í undankeppni, heldur komst hann beint inn í lokaúrtökumótið vegna stöðu sinnar á heimslista áhugakylfinga. Gunnlaugur er í dag sautjándi á heimslistanum, en hann var að ljúka sínu öðru tímabili í bandaríska háskólagolfinu. Í Westerville, þar sem okkar menn spila, mæta 53 kylfingar til leiks. Þar á meðal eru J.B. Holmes, Aaron Baddeley og Lucas Glover, sem vann U.S. Open árið 2009. Gunnlaugur hefur leik kl. 08:12 að staðartíma og Dagbjartur kl. 08:36 (12:12 og 12:36 að íslenskum tíma). Það verður spennandi að fylgjast með þeim félögum í dag, við óskum þeim góðs gengis.  Hér má fylgjast með skori mótsins

Böðvar Bragi Pálsson og Hákon Örn Magnússon luku leik jafnir í öðru sæti GSÍ mótaraðarinnar. Powerade-mót Golfklúbbs Þorlákshafnar lauk í gær en það var jafnframt þriðja mót mótaraðarinnar. Leiknar voru 36 holur á laugardaginn með niðurskurði eftir seinni hringinn, á sunnudaginn voru svo leiknar 18 holur. Böðvar Bragi leiddi mótið í karlaflokki eftir 36 holur á tólf höggum undir pari (-12) eftir tvo frábæra hringi (67-65). Frábær spilamennska hjá Böðvari Braga. Böðvar Bragi endaði mótið jafn í öðru sæti ásamt Hákoni Erni, eftir að Aron Snær (GKG) sótti fjögur högg á Böðvar Braga á síðustu tveimur holunum. Hákon Örn fékk nítján fulga í mótinu sem var mest allra kylfinga en bæði Böðvar Bragi og Aron Snær fengu þrjá erni, sem engin annar kylfingu lék eftir. Perla Sól var efst GR-inga í kvennaflokki og lauk leik í 5. sæti á 7 höggum yfir pari (+7). Við óskum Böðvari Braga og Hákoni Erni innilega til hamingju með sinn árangur!

Kæru félagar Við óskum ykkur innilega til hamingju með opnun á nýrri 1. braut í Grafarholti. Við biðjum ykkur að kynna ykkur nýjar staðarreglur áður en leikur hefst, þær má nálgast hér og tímabundnar staðarreglur má finna hér .  Góða skemmtun og njótið golfsins!

Arkea Montauban Ladies Open mótið á LET Access mótaröðinni hefst í dag. Mótið er það þriðja á LET Access tímabilinu, en leikið er á Golf de Montauban vellinum í Frakklandi. Ragnhildur Kristinsdóttir er meðal keppenda ásamt þeim Hulda Clara Gestsdóttir og Andrea Bergsdóttir. Hér má fylgjast með stöðu mótsins Ragnhildur hefur hafið tímabilið af krafti og er í fjórða sæti stigalistans eftir tvö mót. Hún varð önnur í síðasta móti LET Access, og stóð uppi sem sigurvegari Korpubikarsins á GSÍ mótaröðinni um síðastliðna helgi.

Kæru félagar, Staðarreglur í Grafarholti og á Korpúlfsstöðum hafa verið uppfærðar og er helsta breytingin sú að nú leikum við hreyfingalaust golf, þ.e. nú eru hreyfingar ekki leyfðar, hvorki á flötum né á snöggslegna almenna svæðinu. Við vekjum athygli kylfinga á því að það er ábyrgð hvers og eins leikmanns að kynna sér ávallt staðarreglur þess vallar sem spilaður er. Hér fyrir neðan má finna hlekk á staðarreglur fyrir Korpúlfsstaði, Grafarholt og Thorsvöll. GSÍ hefur sett í gildi reglugerð sem heimilar ekki leikna hringi til forgjafara frá 1. júní til 15. október þegar um hreyfingar á flötum er að ræða. Hlekk á tilkynningu GSÍ og reglugerð GSÍ má finna hér að neðan ásamt hlekk á fréttina “Hvers vegna er ekki heimilt að leyfa bætta legu á flötum?” frá GSÍ. Staðarreglur í Grafarholt Tímabundnar staðarreglur í Grafarholt Staðarreglur Korpúlfsstaðir Staðarreglur Thorsvöllur Reglugerð um forgjafartímabil á Íslandi Reglurgerð um hvenær heimilt er að skrá skor til forgjafar Grein frá GSÍ - Hvers vegna er ekki heimilt að leyfa bætta legu á flötum

Kæru félagar! Eins og þið hafið séð, þá hafa staðið yfir framkvæmdir við endurbætta 1. braut í Grafarholti. Framkvæmdir hófust í októbermánuði 2024 við mótun nýrrar flatar. Síðastliðið vor var sáð í flötina og forflöt og hefur það svæði fengið að dafna síðan þá. Síðastliðið haust hófust framkvæmdir við brautina sjálfa, allt frá veg að nýju forflötinni, með mikilli jarðvegsmótun, ísetningu vökvunarkerfis o.s.frv. Frá því í vor hefur vinnan haldið áfram, með gerð glompa og nú síðast tyrfingu á brautinni. Tyrfingin tókst með eindæmum vel. Brautin er að okkar mati glæsileg, þar sem mikil vinna og metnaður hafa verið lögð í öll smáatriði. Brautin var hönnuð af Tom McKenzie. Lykilmenn í framkvæmdinni hafa verið vallarteymið okkar í Grafarholti, þeir Darren Lee Farley og Bjarni Grétar Sigurðsson ásamt Ellerti Þórarinssyni, yfirmanni framkvæmda og Styrmi Guðmundssyni, forstöðumanni vallarsviðs. Ekki má gleyma verktökunum, en þar ber sérstaklega að nefna Steindór Eiðsson á jarðýtunni, Sveinn Steindórsson gröfumann og Chris Elrick frá Skotlandi, sem tók að sér lokafrágang á glompunum, sem eru glæsilegar á að líta. Við færum þessum hópi, sem og öðrum starfsmönnum sem að hafa komið, sérstakar þakkir. Fyrstu vikurnar verða brautarglompurnar ekki í leik, þær eru enn sandlausar og merktar grund í aðgerð. Við biðjum kylfinga sérstaklega um að að gæta sérstaklega að því, þegar boltar eru sóttir, að ganga varlega um kanta glompanna, þar sem þeir eru einkar viðkvæmir og þurfa lengri tíma til að styrkjast og gróa. Eins og þið sjáið á myndum, var við gerð glompanna notað sérstakt einangrunarlag í jarðveginn sem á að koma í veg fyrir að steinar komi upp í glompurnar vegna frostlyftinga. Lengd brautarinnar Teigur 63 – 335 metrar Teigur 57 – 319 metrar Teigur 52 – 295 metrar Teigur 46 – 287 metrar Við opnun 1. brautar í Grafarholti verður jafnframt 2. braut opnuð og verður Grafarholtsvöllur því leikinn sem 18 holu völlur frá og með næstkomandi laugardegi. Stjórn og starfsmenn GR þakka félagsmönnum fyrir þá þolinmæði og stuðning sem sýndur hefur verið meðan á framkvæmdunum hefur staðið. Við hlökkum til að opna þessa glæsilegu nýju 1. braut og taka á móti kylfingum á laugardaginn kemur.  Stjórn og starfsmenn GR