Opna FootJoy 2026 - úrslit

Axel Bóasson og Guðrún Brá Björgvinsdóttir stóðu uppi sem sigurvegarar á heimavelli þegar Hvaleyrarbikarnum lauk á Hvaleyrarvelli í dag. Guðrún Brá vann kvennaflokkinn með sex högga mun en Axel tryggði sér sigur gegn Sigurði Bjarka Blumenstein á annarri holu bráðabana. Axel hafði betur í bráðabana Axel og Sigurður léku báðir lokahringinn á 69 höggum, þremur undir pari, og áttu bestu hringi dagsins. Sigurður Bjarki lék hringina þrjá á 70, 75 og 69 höggum en Axel á 73, 72 og 69 höggum. Þeir luku því báðir leik á 214 höggum, tveimur höggum undir pari. Þeir léku 15. holu Hvaleyrarvallar í bráðabananum. Báðir fengu par þegar holan var leikin í fyrra skiptið og þurftu því að leika hana aftur. Í seinna skiptið fékk Axel par en Sigurður Bjarki missti parpútt sitt. Axel tryggði sér með því sigur í Hvaleyrarbikarnum. Axel fékk 42 pör, sjö fugla og fimm skolla í mótinu, en enginn kylfingur paraði fleiri holur en heimamaðurinn. Böðvar Bragi Pálsson var einnig í baráttu um sigurinn fram á síðustu holu. Hann þurfti fugl á 18. holu til að komast í bráðabanann en fékk par og lauk leik á einu höggi undir pari. Böðvar varð því þriðji, höggi á eftir Axel og Sigurði Bjarka. Tómas Eiríksson Hjaltested lék lokahringinn á 70 höggum og varð fjórði á pari. Aron Emil Gunnarsson, Guðmundur Ágúst Kristjánsson og Aron Snær Júlíusson urðu jafnir í fimmta sæti á tveimur höggum yfir pari. Guðrún Brá leiddi frá fyrsta hring Guðrún Brá hóf lokahringinn með fimm högga forskot og var sigur hennar aldrei í hættu. Hún lék lokahringinn á 75 höggum, þremur yfir pari, og lauk mótinu á 220 höggum, fjórum höggum yfir pari. Guðrún Brá vann með sex högga mun eftir hringi upp á 73, 72 og 75 högg. Stöðugleiki einkenndi spilamennsku Guðrúnar í mótinu. Hún fékk 40 pör á holunum 54, auk fimm fugla og níu skolla. Hún fékk engann tvöfaldan skolla í öllu mótinu. Perla Sól Sigurbrandsdóttir átti besta hring dagsins í kvennaflokki. Hún lék á 73 höggum, einu yfir pari, og fór upp um tvö sæti. Perla varð jöfn Elsu Maren Steinarsdóttur í öðru sæti á tíu höggum yfir pari. Perla fékk jafnframt flesta fugla í kvennaflokki í mótinu, eða átta. Heiða Rakel Rafnsdóttir og Þóra Sigríður Sveinsdóttir urðu jafnar í fjórða sæti á 17 höggum yfir pari. Alls 446 fuglar og níu ernir Keppendur fengu samtals 446 fugla og níu erni í mótinu. Sjöunda hola Hvaleyrarvallar reyndist léttust og var leikin að meðaltali á 0,34 höggum undir pari. Tólfta holan var erfiðust og var leikin á 0,83 höggum yfir pari að meðaltali. Róbert Leó Arnórsson og Breki Gunnarsson Arndal fengu flesta fugla í karlaflokki, tólf hvor. Sigurður Bjarki var skammt undan með ellefu fugla og einn örn. Þessi tölfræði var sótt af skemmtilegri og nýrri upplýsingasíðu mótsins. Óskum öllum verðlaunahöfum til hamingju með árangurinn og þökkum Golfklúbbnum Keili fyrir frábært mót

Kæru kylfingar Vegna mikillar rigningar síðustu daga og þá næstu hafa vallarstjórar tekið ákvörðun um að leyfa ekki golfbíla á völlum félagsins í á morgun (þriðjudag) og á miðvikudaginn. Tekin verður ákvörðun með seinnpart vikunnar þegar nær dregur og það tilkynnt. Kveðja, Vallarsvið.

Íslandsmóti eldri kylfinga lauk á Kiðjabergsvelli í dag. Mótið fór fram dagana 16.-18. júlí og voru leiknar 54 holur í fjórum flokkum, 50 ára og eldri og 65 ára og eldri karla og kvenna. Þórdís Geirsdóttir, Sigurbjörn Þorgeirsson, Guðrún Garðars og Gauti Grétarsson fögnuðu Íslandsmeistaratitlum eldri kylfinga 2026 eftir skemmtilegt og spennandi mót. Hér má sjá úrslit mótsins í heild sinni Þórdís Íslandsmeistari í flokki 50+ kvenna Þórdís Geirsdóttir úr Golfklúbbnum Keili varð Íslandsmeistari í flokki 50 ára og eldri og varði því titil sinn. Hún lék hringina þrjá á 81, 86 og 82 höggum og lauk leik á 249 höggum, 36 höggum yfir pari. Þórdís var með fimm högga forskot fyrir lokahringinn og hélt forystunni sinni þrátt fyrir góða spilamennsku Ragnheiðar Sigurðardóttur í dag. Ragnheiður átti besta hring dagsins í flokknum, en hún lék á 80 höggum og minnkaði forskotið niður í þrjú högg. Helga Þorvaldsdóttir lék lokahringinn á 83 höggum og tryggði sér þriðja sætið á 259 höggum. Lilja Guðríður Karlsdóttir varð fjórða og Sigríður Kristinsdóttir fimmta. Miklar sviptingar á lokaholunum í flokki 50+ karla Mikil spenna var í flokki 50 ára og eldri karla þar sem úrslitin réðust ekki fyrr en á lokaholunni. Sigurbjörn Þorgeirsson úr Golfklúbbi Fjallabyggðar varð Íslandsmeistari á 228 höggum, 15 höggum yfir pari, og varði einnig titil sinn. Sigurbjörn hóf lokahringinn tveimur höggum á undan Jóni Karlssyni en þremur höggum á eftir Jóni Snorra Halldórssyni. Allir þrír voru því í baráttunni um titilinn. Jón Snorri var enn þremur höggum á undan Sigurbirni eftir 12 holur lokahringsins. Jón fékk hins vegar tvöfaldan skolla á 13. holu og skolla á þremur holum í röð þar á eftir. Sigurbjörn jafnaði við hann á 14. holu, komst höggi fram úr á þeirri 15. og bætti öðru höggi við forskotið á lokaholunni. Á sama tíma lék Jón Karlsson frábært golf í dag og var kominn einu höggi á undan Sigurbirni þegar þrjár holur voru eftir. Báðir fengu þeir skolla á 16. holu en Jón fékk annan skolla á þeirri 17. og voru þeir því jafnir fyrir lokaholuna. Sigurbjörn gerði sér lítið fyrir og fékk fugl á 18. holu á meðan Jón fékk skolla. Tveggja högga sveifla á lokaholunni og Sigurbjörn Íslandsmeistari á nýjan leik. Jón Karlsson og Jón Snorri Halldórsson enduðu jafnir í öðru sæti á 230 höggum. Árni Páll Hansson varð fjórði á 232 höggum og Frans Páll Sigurðsson fimmti, aðeins höggi þar á eftir. Guðrún hafði betur eftir jafna baráttu í flokki 65+ kvenna Guðrún Garðars úr Golfklúbbi Reykjavíkur varð Íslandsmeistari í flokki 65 ára og eldri. Hún og Steinunn Sæmundsdóttir einnig úr Golfklúbbi Reykjavíkur voru jafnar fyrir lokahringinn eftir að hafa báðar leikið fyrstu tvo hringina á 84 höggum. Guðrún lék lokahringinn á 82 höggum og lauk mótinu á 250 höggum, 37 höggum yfir pari. Hún var einu höggi á undan Steinunni þegar þrjár holur voru eftir og bætti tveimur höggum við forskotið á lokaholunum. Steinunn lék lokahringinn á 85 höggum og varð önnur, þremur höggum á eftir Guðrúnu. María Málfríður Guðnadóttir, ríkjandi meistari flokksins, átti einnig góðan lokahring upp á 82 högg og varð þriðja á 257 höggum. Ágústa Dúa Jónsdóttir varð fjórða og Jóhanna Ríkey Sigurðardóttir fimmta. Öruggur sigur Gauta í flokki 65+ karla Gauti Grétarsson úr Nesklúbbnum tryggði sér öruggan sigur í flokki 65 ára og eldri. Hann lék hringina á 78, 74 og 75 höggum og lauk mótinu á 227 höggum, 14 höggum yfir pari. Gauti var með níu högga forskot fyrir lokahringinn og bætti höggum við það á lokadeginum. Hann vann að lokum með þrettán högga mun. Kristján V. Kristjánsson úr Golfklúbbnum Keili varð annar á 240 höggum eftir tvo hringi í röð á 77 höggum. Brynjar Harðarson úr Golfklúbbi Reykjavíkur varð þriðji, Hlöðver Sigurgeir Guðnason fjórði og Kristinn Þórir Kristjánsson fimmti.

Það er aldeilis búin að vera barátta á toppnum í Hvaleyrarbikarnum! Aron Snær lék annan hringinn á 70 höggum, tveimur undir pari, og er samtals á fjórum höggum undir pari. Hann hefur leikið báða hringi mótsins á 70 höggum og leiðir með einu höggi. Böðvar Bragi Pálsson er einn í öðru sæti á þremur höggum undir pari eftir hringi upp á 71 og 70 högg. Böðvar hefur sýnt mikinn stöðugleika og aðeins fengið tvo skolla á hringjunum tveimur. Hann hefur fengið 29 pör og fimm fugla. Jóhannes Guðmundsson, ríkjandi meistari Hvaleyrarbikarsins, er í þriðja sæti á einu höggi undir pari. Hann lék annan hringinn á pari. Guðrún Brá Björgvinsdóttir leiðir kvennaflokkinn á einu höggi yfir pari. Elsa Maren Steinarsdóttir lék annan hringinn á 74 höggum og færðist upp um tvö sæti. Hún er ein í öðru sæti á sex höggum yfir pari. Þóra Sigríður Sveinsdóttir er í þriðja sæti á átta höggum yfir pari og Perla Sól Sigurbrandsdóttir í því fjórða á níu höggum yfir pari. Ný og skemmtileg upplýsingasíða mótsins hefur reynst áhorfendum vel. Þar má finna öll helstu skor, tölfræði og upplýsingar frá mótinu. Keppendur hafa samtals fengið 325 fugla og sjö erni eftir fyrstu tvo hringina. Sjöunda hola Hvaleyrarvallar hefur reynst gjöfulust og verið leikin að meðaltali á 0,34 höggum undir pari. Tólfta holan hefur verið erfiðust og verið leikin á 0,86 höggum yfir pari að meðaltali. Hægt er að fylgjast með stöðunni og ítarlegri tölfræði í beinni á mótasíðu Hvaleyrarbikarsins .

Golf 14 og Unglingamótaröð GSÍ heimsækja Jaðarsvöll á Akureyri næstu dagana, þar sem ungir og efnilegir kylfingar leika við frábærar aðstæður. Um 140 kylfingar mæta til leiks í mótin tvö, og verður því mikið líf á svæðinu. Veðrið ætti að leika við kylfinga á Akureyri, en spáð er um 20 gráðum alla þrjá keppnisdagana. Unglingamótaröðin Unglingamótaröðin fer fram dagana 17.-19. júlí. Leikinn er 54 holu höggleikur án forgjafar í flokkum 15-18 ára pilta og stúlkna. Einnig verða veitt verðlaun fyrir besta árangur í flokki 17-18 ára og 15-16 ára. 82 kylfingar keppa í mótinu, 25 stúlkur og 57 drengir. Hér má sjá rástíma og stöðu í Unglingamótaröðinni Golf 14 Golf 14 mótið fer fram dagana 18.-19. júlí. Keppt verður í flokki 14 ára og yngri drengja og stúlkna og leikinn höggleikur án forgjafar. Til leiks mæta 57 kylfingar, 47 drengir og 10 stúlkur. Hér má sjá rástíma og stöðu Golf 14

Golfklúbburinn Keilir heldur Hvaleyrarbikarinn 2026 dagana 17.-19. júlí. Mótið er fimmta mótið á GSÍ mótaröðinni á þessu tímabili. Smelltu hér fyrir stöðu, rástíma og úrslit. Í karlaflokki eru 76 kylfingar skráðir til leiks. Golfklúbbur Reykjavíkur á flesta kylfinga, alls 23, eða rúmlega 30% keppenda. Sjö forgjafarlægstu kylfingarnir eru allir með +4.5 eða lægra. Hér má sjá lista yfir þá. Logi Sigurðsson, Golfklúbbi Suðurnesja +5,5 Guðmundur Ágúst Kristjánsson, Golfklúbbi Reykjavíkur +5,2 Hákon Örn Magnússon, Golfklúbbi Reykjavíkur +4,7 Daníel Ísak Steinarsson, Golfklúbbnum Keili +4,6 Axel Bóasson, Golfklúbbnum Keili +4,5 Aron Emil Gunnarsson, Golfklúbbi Selfoss +4,5 Aron Snær Júlíusson, Golfklúbbi Kópavogs og Garðabæjar +4,5 Meðalforgjöf karlaflokksins er +0,7. Í kvennaflokki mæta 17 kylfingar til leiks frá níu golfklúbbum. Golfklúbburinn Keilir á flesta keppendur, alls fjóra. Sjö forgjafarlægstu kylfingarnir eru allir með +4.5 eða lægra. Hér má sjá lista yfir þá. Guðrún Brá Björgvinsdóttir, Golfklúbbnum Keili +3,7 Perla Sól Sigurbrandsdóttir, Golfklúbbi Reykjavíkur +2,9 Fjóla Margrét Viðarsdóttir, Golfklúbbi Suðurnesja +1,6 Elsa Maren Steinarsdóttir, Golfklúbbnum Leyni +1,5 Guðrún Birna Snæþórsdóttir, Golfklúbbnum Keili 0,3 Ásdís Valtýsdóttir, Golfklúbbi Reykjavíkur 0,3 Heiða Rakel Rafnsdóttir, Golfklúbbi Mosfellsbæjar 0,6 Meðalforgjöf kvennaflokksins er 1.5. Bikarinn hannaður í Japan Keppt er um Hval­eyr­ar­bik­ar­ana eins og nafn mótsins gefur til kynna. Verðlauna­grip­ur­inn á sér nokkra sögu og óvenjulega. Er hann einn af elstu bik­ur­un­um í safn­inu hjá golf­klúbbn­um Keili. Var bik­ar­inn gef­inn af Toyota umboðinu árið 1979 eða tólf árum eft­ir að klúbbur­inn var stofnaður. Var keppt um bik­ar­inn á opnu móti hjá Keili sem haldið var í nokk­ur ár. Bik­ar­inn er veg­leg­ur og frem­ur óvenju­leg­ur í út­liti. Var hann hannaður og sér­smíðaður í listagalle­rí í Jap­an á sín­um tíma. Þegar stiga­mót­inu Hval­eyr­ar­bik­arn­um var komið á fót árið 2016 þurfti að búa til annað ein­tak enda keppt í tveim­ur flokk­um í Hval­eyr­ar­bik­arn­um. Var bik­ar­inn send­ur til Kína með það fyr­ir aug­um að búa til eft­ir­lík­ingu en Kín­verj­arn­ir sem ætluðu að taka verkið að sér treystu sér ekki til þess þegar á hólm­inn var komið. Höfðu Keil­is­menn þá upp á listagalle­rí­inu í Jap­an og var þar smíðaður ann­ar bik­ar sem gef­inn var af Icewe­ar. Þá þurfti raun­ar einnig að gera lít­il­lega við bik­ar­inn sem hafði skemmst á heim­leiðinni frá Jap­an. Bik­ar­inn hef­ur því farið nokkr­ar ferðir á milli Íslands og Asíu. Mikilvæg stig á stigalista GSÍ Hvaleyrarbikarinn er fimmta mót ársins á GSÍ mótaröðinni. Hér má sjá stöðu á stigalistum karla og kvenna .

Íslandsmót eldri kylfinga fer fram á Kiðjabergsvelli dagana 16.-18. júlí. Keppt er í tveimur aldursflokkum hjá körlum og konum, 50 ára og eldri, og 65 ára og eldri. Smelltu hér fyrir rástíma og stöðu mótsins: Alls er 61 keppandi skráður, frá 14 golfklúbbum. Golfklúbbur Reykjavíkur á flesta keppendur, alls 20. Næstflestir koma frá Golfklúbbi Kópavogs og Garðabæjar, eða 12. Lægstu forgjafir mótsins eiga Jón Snorri Halldórsson og Jón Karlsson í karlaflokki með +0.1, og Þórdís Geirsdóttir í kvennaflokki með 1,0. Þórdís Geirsdóttir, Sigurbjörn Þorgeirsson, María Málfríður Guðnadóttir og Hannes Eyvindsson eru ríkjandi meistarar mótsins, en Hannes er sá eini sem verður ekki á meðal keppenda í ár. Aðrir ríkjandi meistarar mæta á Kiðjaberg til að verja titilinn. 

Kæru kylfingar Vallarsvið hefur ákveðið að leyfa golfbílaumferð á báðum völlum félagsins í dag með takmörkunum. Við biðjum kylfinga á golfbílum að keyra á göngustígum þar sem því er við komið og fylgja skiltum og reipum sem vallarstjórar hafa sett upp. Verði þessum takmörkunum ekki fylgt eftir þarf að endurskoða hvort hægt sé að leyfa golfbílaumferð. Við erum í þessu saman - förum vel með fallegu golfvellina okkar!

Opna FootJoy 2026 verður haldið á Grafarholtsvelli sunnudaginn 19. júlí. Ræst verður út frá kl. 8:00. Leikfyrirkomulag mótsins er punktakeppni og höggleikur. Hámarksforgjöf er gefin 24 hjá körlum og 28 hjá konum. Veitt verða glæsileg verðlaun fyrir 3 efstu sætin í punktakeppni karla og kvenna ásamt besta skori í höggleik karla og kvenna. Nándarverðlaun eru veitt þeim sem er næstur holu í upphafshöggi á öllum par 3 brautum vallarins. Einnig verða veitt verðlaun fyrir lengsta upphafshögg á 3. braut karla og kvenna. Skráning í mótið fer fram í mótaskrá á Golfbox - skráningin er í fullum gangi og lokar laugardaginn 18. júlí kl. 19:50 - mótsgjald er kr. 7.250 og greiðist við skráningu. Glæsileg verðlaun verða veitt, að vanda, fyrir þrjá efstu í punktakeppni karla og kvenna auk verðlauna fyrir besta skor í karla- og kvennaflokki. Punktakeppni karla: sæti: FJ fatapakki (2x peysur, 2x bolir og jakki) og FJ bakpoki sæti: FJ Pro SL golfskór og golfsokkar sæti: FJ Chill-out golfpeysa og FJ skópoki Punktakeppni kvenna: sæti: FJ fatapakki (2x peysur, 2x bolir og jakki) og FJ bakpoki sæti: FJ Pro SL golfskór og golfsokkar sæti: FJ Chill golfpeysa og FJ skópoki Besta skor karla: FJ Pro SL golfskór og dúsín af Titleist Pro V1. Besta skor kvenna: FJ Pro SL golfskór og dúsín af Titleist Pro V1x. Nándarverðlaun: 2.braut: FJ skópoki, sokkar og derhúfa 6.braut: FJ skópoki, sokkar og derhúfa 11.braut: FJ skópoki, sokkar og derhúfa 17.braut: FJ skópoki, sokkar og derhúfa Lengsta teighögg á 3. braut karla: Gjafabréf fyrir fjóra á velli Golfklúbbs Reykjavíkur og Platínukort í Bása Lengsta teighögg á 3. braut kvenna: Gjafabréf fyrir fjóra á velli Golfklúbbs Reykjavíkur og Platínukort í Bása Teiggjöf Allir keppendur fá afhenta teiggjöf áður en leikur hefst.