Íslandsmótið í golfi fer fram á Korpúlfsstaðavelli dagana 6.-9. ágúst. Alls munu 40 kylfingar leika í kvennaflokki og stefnir allt í mikla baráttu um Íslandsmeistaratitilinn. Meðalforgjöf keppenda flokksins er 1,6. Tólf kylfingar eru með 0 eða lægra í forgjöf og sjö forgjafarlægstu kylfingar mótsins eru með +1,6 eða lægra. Golfklúbbur Reykjavíkur á flesta keppendur í kvennaflokki, alls tíu. Golfklúbbur Kópavogs og Garðabæjar á níu kylfinga, en Golfklúbbur Mosfellsbæjar og Golfklúbburinn Keilir eiga átta hvor. Alls eiga tólf golfklúbbar kylfinga í kvennaflokki mótsins. Ragnhildur með lægstu forgjöfina Atvinnukylfingurinn Ragnhildur Kristinsdóttir úr GR er forgjafarlægsti kylfingurinn á keppendalistanum með +3,9 í forgjöf. Hún hefur leikið frábært golf á tímabilinu og mætir á heimavöll með augun á titlinum. Ragnhildur varð önnur á Allegria Ladies Open á LET Access-mótaröðinni í Austurríki í maí og fylgdi þeim árangri eftir með sigri í Korpubikarnum á Korpúlfsstaðavelli. Þar lék hún lokahringinn á 65 höggum og vann með fimm högga mun. Hún varð einnig jöfn í þriðja sæti á Women’s English Open fyrr í júlí og situr í tíunda sæti stigalista LET Access-mótaraðarinnar. Ragnhildur varð Íslandsmeistari árið 2023 og hefur margoft verið í baráttu um titilinn. Að þessu sinni fær hún tækifæri til að sækja sinn annan titil, nú á heimavelli. Guðrún Brá mætir í titilvörn Ríkjandi Íslandsmeistarinn Guðrún Brá Björgvinsdóttir úr Keili er næst forgjafarlægst með +3,6. Guðrún vann sinn fjórða Íslandsmeistaratitil á Hvaleyrarvelli í fyrra eftir umspil við Huldu Clöru Gestsdóttur. Áður hafði hún sigrað þrjú ár í röð, frá 2018 til 2020. Guðrún vann sér inn þátttökurétt á LET-mótaröðinni fyrir tímabilið og hefur leikið í sex mótum á þessu stærsta sviði atvinnukylfinga í Evrópu í sumar. Hún hefur þegar unnið Íslandsmeistaratitil á árinu, en hún varð Íslandsmeistari í holukeppni á Urriðavelli í júní. Þá stóð hún einnig uppi sem sigurvegari í Hvaleyrarbikarnum í júlí, og hefur því unnið bæði mót sín hér á landi í sumar. Perla Sól leiðir stigalistann Eva Kristinsdóttir úr Golfklúbbi Mosfellsbæjar er með þriðju lægstu forgjöfina, +2,9. Eva hefur leikið vel í sumar og vann meðal annars mót GSÍ mótaraðarinnar í Þorlákshöfn. Hún var einnig á verðlaunapalli í Korpubikarnum og Reykjanesmótinu. Guðrún J. Nolan Þorsteinsdóttir kemur næst með +2,0 og Karen Lind Stefánsdóttir, GKG, er með +1,7. Karen er fjórða á stigalista mótaraðarinnar, en hún hefur leikið mjög vel í sumar. Hún stóð uppi sem sigurvegari Lexus bikarsins sem lauk um helgina, sem var síðasta mótið fyrir Íslandsmót. Elsa Maren Steinarsdóttir úr Golfklúbbnum Leyni og Perla Sól Sigurbrandsdóttir úr GR eru báðar með +1,6. Perla verður ein þeirra sem stefnir á sigur á heimavelli. Hún varð Íslandsmeistari í Vestmannaeyjum árið 2022, aðeins 15 ára gömul, og er næstyngsti sigurvegari mótsins frá upphafi. Perla hóf sumarið með sigri á Reykjanesmótinu og varð síðan önnur í Korpubikarnum. Hún hefur endað í verðlaunasæti í fimm af sex mótum tímabilsins og er efst á stigalista kvenna. Hún varð jafnframt þriðja á Íslandsmótinu í fyrra og lék þá á besta skori áhugakylfings í kvennaflokki. Fjórir fyrrverandi meistarar Fjórir kylfingar á keppendalistanum hafa áður orðið Íslandsmeistarar í golfi. Auk Guðrúnar Brár, Ragnhildar og Perlu Sólar er þar Þórdís Geirsdóttir úr Keili, sem varð Íslandsmeistari árið 1987. Þórdís varð nýverið Íslandsmeistari í flokki 50 ára og eldri og varði þar titil sinn. Hún heldur því áfram að bæta við glæsilegan feril og verður enn á ný á meðal keppenda á stærsta móti ársins. Það stefnir allt í frábært Íslandsmót á Korpúlfsstaðavelli í ágúst. Við hvetjum alla sem geta til að mæta á völlinn og fylgjast með okkar bestu kylfingum leika um Íslandsmeistaratitilinn.
Íslandsmót unglinga 2026 í holukeppni fór fram á Selfossi dagana 23.-25. júlí. Keppni í flokki 12 ára og yngri hófst með höggleik þar sem kylfingum var raðað í sæti fyrir útsláttarkeppnina. Átta efstu kylfingarnir komust áfram í átta manna úrslit. Til úrslita í drengjaflokki 12 ára og yngri léku Ísak Hrafn Jónasson (GR) og Andri Mikael Steindórsson. Ísak Hrafn hafði betur, 3/1, og tryggði sér þar með Íslandsmeistaratitilinn í holukeppni 2026. Ísak Hrafn varð jafn í þriðja sæti í höggleiknum og hóf útsláttarkeppnina á 3/1 sigri gegn Gunnari Helga Kristinssyni. Í undanúrslitum mætti hann Eiríki Boga Karlssyni, sem hafði verið efstur eftir höggleikinn, og vann spennandi leik þeirra 2/1. Andri Mikael, sem var sjöundi í röðuninni, vann tvo jafna leiki á leið sinni í úrslitin. Hann lagði Ólaf Bjarna Þórðarson 3/2 í átta manna úrslitum og vann síðan Sigurð Markús Sigurðarson (GR) með sama mun í undanúrslitum. Eiríkur Bogi tryggði sér þriðja sætið með öruggum 6/3 sigri gegn Sigurði Markúsi í leiknum um bronsið. Í flokki 15-16 ára var ekki leikinn höggleikur áður en útsláttarkeppnin hófst. Keppendum var þess í stað raðað í sæti eftir stöðu þeirra á stigalista mótaraðarinnar í sumar. Sextán kylfingar hófu leik í útsláttarkeppninni. Til úrslita léku Arnar Freyr Viðarsson og Birgir Steinn Ottósson (GR). Arnar Freyr vann úrslitaleikinn 2/1 og tryggði sér þar með Íslandsmeistaratitilinn í holukeppni 2026. Birgir Steinn var sjötti í röðuninni. Hann vann Matthías Jörva Jensson 2/1 í fyrstu umferð og Ágúst Má Þorvaldsson með sama mun í átta manna úrslitum. Undanúrslitaleikur Birgis Steins og Hjalta Kristjáns Hjaltasonar var afar jafn og réðust úrslitin ekki fyrr en á 15. holu, þar sem Birgir Steinn tryggði sér sigurinn. Sara María var efst í röðuninni. Hún vann Ástu Rebekku Þorsteinsdóttur (GR) 5/4 í átta manna úrslitum og mætti síðan Kötlu Maríu Sigurbjörnsdóttur (GR) í undanúrslitum. Sara María hafði betur, 3/2, og tryggði sér sæti í úrslitaleiknum. Katla María tryggði sér þriðja sætið með 3/2 sigri gegn Hrefnu Líf í leiknum um bronsið.
Golfklúbbur Reykjavíkur hefur þann heiður að halda Íslandsmótið í golfi 2026 í góðu samstarfi við Golfsamband Íslands. Og við þurfum á þinni hjálp að halda! Mótið fer fram dagana 6.–9. ágúst á Korpu þar sem leikið verður á völlunum Sjórinn og Áin. Markmið okkar er að skapa glæsilega umgjörð fyrir bæði keppendur og áhorfendur og gera Íslandsmótið að eftirminnilegum viðburði. Til þess þurfum við á öflugum hópi sjálfboðaliða að halda og leitum því til félagsmanna Golfklúbbs Reykjavíkur eftir aðstoð. Hlutverk sjálfboðaliða - við leitum meðal annars að sjálfboðaliðum í eftirtalin verkefni: Framverði og gæslu áhorfenda. Bílastæðavörslu / Leiðaraaðstoð Bera sand í kylfuför (kvöldvinna) Önnur fjölbreytt verkefni sem tengjast framkvæmd mótsins. Aðbúnaður sjálfboðaliða Allir sjálfboðaliðar fá vinnufatnað frá 66°Norður meðan á mótinu stendur. Einnig verður sérstök aðstaða fyrir sjálfboðaliða á 2. hæð í Korpu þar sem boðið verður upp á veitingar og góða hvíldaraðstöðu á milli verkefna. Vaktir - boðið verður upp á þrjár vaktir á hverjum keppnisdegi: Morgunvakt: kl. 7:00–11:00 Miðdagsvakt: kl. 10:30–16:00 Síðdegisvakt: kl. 15:30–20:30 Við vonum innilega að sem flestir félagsmenn Golfklúbbs Reykjavíkur sjái sér fært að leggja hönd á plóg og taka þátt í þessu stóra verkefni. Það er bæði ánægjulegt og gefandi að taka þátt í mótahaldi sem þessu, kynnast öðrum félagsmönnum og leggja sitt af mörkum til að gera Íslandsmótið að glæsilegri upplifun fyrir alla. Skráðu þig sem sjálfboðaliða og vertu hluti af einu stærsta golfmóti ársins. Við hlökkum til að starfa með þér! Taktu þátt!
Kæru kylfingar Vegna mikillar rigningar og vætu undanfarna daga eru vellir félagsins ennþá mjög votir. Í ljósi þess hafa vallarstjórar tekið ákvörðun um að leyfa ekki golfbíla á völlum félagsins um helgina. Kveðja, Vallarsvið.
Kæru kylfingar Vegna mikillar rigningar síðustu daga eru vellir félagsins ennþá vel blautir. Í ljósi þess hafa vallarstjórar tekið ákvörðun um að leyfa ekki golfbíla á völlum félagsins á morgun föstudag. Tekin verður ákvörðun um umferð golfbíla dag frá degi á meðan völlurinn er að drena sig. Kveðja, Vallarsvið.
Golfklúbbur Kópavogs og Garðabæjar heldur Lexus bikarinn á GSÍ mótaröðinni dagana 23.-25. júlí. Mótið er sjötta mótið á GSÍ mótaröðinni á þessu tímabili og það síðasta fyrir Íslandsmótið í golfi. Smelltu hér fyrir stöðu, rástíma og úrslit. Í karlaflokki eru 54 kylfingar skráðir til leiks. Golfklúbbur Reykjavíkur og Golfklúbbur Kópavogs og Garðabæjar senda flesta kylfinga í mótið, en 13 kylfingar koma úr hvorum klúbbnum. Fimm forgjafarlægstu kylfingarnir eru allir með +3,9 eða lægra. Hér má sjá lista yfir þá. Logi Sigurðsson, Golfklúbbi Suðurnesja +5,5 Daníel Ísak Steinarsson, Golfklúbbnum Keili +4,9 Axel Bóasson, Golfklúbbnum Keili +4,8 Aron Snær Júlíusson, Golfklúbbi Kópavogs og Garðabæjar +4,6 Aron Emil Gunnarsson, Golfklúbbi Selfoss +3,9 Í kvennaflokki mæta 16 kylfingar til leiks frá níu golfklúbbum. GKG á flesta keppendur, alls fjóra. Fimm forgjafarlægstu kylfingarnir eru allir með +0,3 eða lægra. Hér má sjá lista yfir þá. Perla Sól Sigurbrandsdóttir, Golfklúbbi Reykjavíkur +1,6 Karen Lind Stefánsdóttir, Golfklúbbi Kópavogs og Garðabæjar +1,6 Fjóla Margrét Viðarsdóttir, Golfklúbbi Suðurnesja +1,6 Andrea Ýr Ásmundsdóttir, Golfklúbbi Akureyrar +1,3 Guðrún Birna Snæþórsdóttir, Golfklúbbnum Keili 0,3 Mikilvæg stig á stigalista GSÍ Mótið er sjötta mót ársins á GSÍ mótaröðinni. Línurnar eru farnar að skýrast og stigin á síðustu tveimur mótunum gífurlega dýrmæt. Aron Snær Júlíusson og Perla Sól Sigurbrandsdóttir hafa leitt listana frá fyrsta móti og eru í góðri stöðu. Það verður spennandi að fylgjast með hvernig mótið þróast um helgina og hvaða áhrif það mun hafa á stigalistana. Hér má sjá stöðu á stigalistum karla og kvenna .
Íslandsmót unglinga í holukeppni 2026 fer fram á Svarfhólsvelli á Selfossi dagana 23.-25. júlí. Keppt verður um Íslandsmeistaratitla í átta aldursflokkum, allt frá 12 ára og yngri upp í 17–18 ára. Hér má sjá rástíma, stöðu og úrslit mótsins Keppt er í eftirtöldum flokkum: Stúlknaflokkur 12 ára og yngri, hámarksforgjöf 40,0 – rauðir teigar Stelpnaflokkur 13-14 ára, hámarksforgjöf 32,0 – rauðir teigar Stúlknaflokkur 15-16 ára, hámarksforgjöf 20,0 – bláir teigar Stúlknaflokkur 17-18 ára, hámarksforgjöf 15,0 – bláir teigar Drengjaflokkur 12 ára og yngri, hámarksforgjöf 40,0 – rauðir teigar Drengjaflokkur 13-14 ára, hámarksforgjöf 32,0 – bláir teigar Drengjaflokkur 15-16 ára, hámarksforgjöf 20,0 – gulir teigar Drengjaflokkur 17-18 ára, hámarksforgjöf 15,0 – hvítir teigar Leiknar verða 14 holur í öllum flokkum og ræðst fyrirkomulag mótsins af aldri keppenda. Í flokkum 12 ára og yngri og 13-14 ára hefst keppnin á höggleik án forgjafar. Átta efstu kylfingarnir í hverjum flokki komast áfram í holukeppni, þar sem leikið verður til úrslita. Hér má sjá úrslit höggleiksins Í flokkum 15-16 ára og 17-18 ára verður leikin útsláttarkeppni án forgjafar. Allt að 16 kylfingar hefja leik í hverjum flokki og verður þeim raðað upp eftir stöðu á stigamótaröð unglinga. Stigahæsti keppandinn mætir þeim stigalægsta og svo koll af kolli. Verði átta eða færri skráðir í flokki hefst keppnin beint í átta manna úrslitum. Hér má finna alla keppnisskilmála mótsins
Kæru kylfingar Vegna mikillar rigningar síðustu daga og þá sérstaklega í dag þá hafa vallarstjórar tekið ákvörðun um að leyfa ekki golfbíla á völlum félagsins á morgun fimmtudag. Tekin verður ákvörðun um umferð golfbíla fyrir föstudaginn, seinnipartinn á morgun. Kveðja, Vallarsvið.
Kæru félagsmenn, nú styttist óðfluga í að GR haldi stærsta golfmót ársins að Korpúlfsstöðum og er undirbúningur í fullum gangi. Því miður missa félagsmenn Korpúlfsstaði þá vikuna, en það gleður okkur að tilkynna að við munum opna nýja teiga og flöt á 3. braut í Grafarholti ásamt nýjum teigum á 4. braut þriðjudaginn 4.ágúst og vonum við að það mælist vel fyrir. Verði áfram mikil vætutíð eða láti svæðin mikið á sjá þá gætum við þurft að endurskoða, en við vonum það besta ! Samhliða þessu þá tilkynnist hér með opnun nýrra 63. teiga á Korpu, á brautum 2, 4, 9, 11 og 14, frá og með komandi föstudegi 24.júlí (síðdegis). Þessir teigar verða notaðir í komandi Íslandsmóti og nú getur okkar besta fólk farið að æfa sig á nýjum teigum, sem margir hverjir setja sterkan svip á völlinn. Golfkveðja, Vallarsvið
Unglingamótaröðin heimsótti Jaðarsvöll á Akureyri um helgina, þar sem ungir og efnilegir kylfingar léku við frábærar aðstæður. Tæplega 80 kylfingar mættu til leiks í mótið og var mikið líf á svæðinu. Leikinn var 54 holu höggleikur án forgjafar í flokki 15-18 ára drengja og stúlkna. Einnig voru veitt verðlaun fyrir bestan árangur í flokki 15-16 ára og 17-18 ára. Í stúlknaflokki stóð Embla Hrönn Hallsdóttir, GKG, uppi sem sigurvegari, en hún lék hringina þrjá á 77, 69 og 74 höggum og lauk leik á sjö höggum yfir pari. Embla leiddi með fjórum höggum fyrir lokahringinn og bætti við forskotið með flottum lokahring. Bryndís Eva Ágústsdóttir, GA, varð önnur á þrettán höggum yfir pari og Ásdís Rafnar Steingrímsdóttir, GR, varð þriðja á fjórtán höggum yfir pari. Ásdís fékk flest pör allra kylfinga mótsins, alls 35 á hringjunum þremur. Bryndís kom næst á eftir með 33 pör. Embla sótti högg sín á par 3 og par 5 holum Jaðarsvallar, en hún var með besta meðalskor flokksins á þeim báðum. Kristín María Valsdóttir, GK, lék á besta skori 15-16 ára stúlkna, en hún lauk leik á 30 höggum yfir pari eftir hringi upp á 80, 81 og 82 högg. Kristján Karl Guðjónsson, GM, vann piltaflokkinn á einu höggi undir pari. Hann léki hringi sína á 68, 75 og 69 höggum og leiddi frá fyrsta hring. Þetta er þriðji sigur Kristjáns í fjórum mótum, en hann hefur leikið öll fjögur mótin undir pari. Gunnar Þór Heimisson og Arnar Daði Svavarsson, báðir GKG, deildu öðru sætinu á sex höggum yfir pari. Heimamennirnir Ágúst Már Þorvaldsson og Egill Örn Jónsson voru jafnir í fyrsta sæti 15-16 ára pilta á tíu höggum yfir pari. Þeir léku bráðabana um sigurinn þar sem Ágúst hafði betur. Hér má sjá úrslit mótsins í heild sinni Myndasíða Unglingamótaraðarinnar 2026 Myndasíða Golf14 2026 Myndasíða GSÍ mótaraðarinnar 2026
