Hjóna- og parakeppni GR 2026 - úrslit

Kæru kylfingar vegna mikillar bleytu og rigningar í dag og eitthvað næstu daga verða engir golfbílar leyfðir á völlum félagsins þar til annað verður gefið út. Vallarsvið

Dagbjartur Sigurbrandsson, Sigurður Arnar Garðarsson og Ragnar Már Garðarsson tryggðu sér sæti á öðru stigi úrtökumóta fyrir DP World Tour með frammistöðu sinni á Golf-und Country Club Seddiner See í Þýskalandi.  Nítján efstu kylfingarnir komust áfram. Til að ná þeim árangri þurfti að minnsta kosti að leika á fjórum höggum undir pari, og voru íslensku kylfingarnir þrír á enn lægra skori. Dagbjartur náði bestum árangri Íslendinganna og endaði jafn í sjötta sæti á níu höggum undir pari. Hann lék hringina fjóra á 71, 69, 70 og 69 höggum og endaði sex höggum á eftir sigurvegara mótsins. Sigurður Arnar lék frábært golf á lokahringnum og kom inn á 68 höggum, fjórum undir pari. Hann lyfti sér upp í 11. sætið og lauk mótinu á sex höggum undir pari. Ragnar endaði jafn í 14. sæti á fimm höggum undir pari. Hann lék best á öðrum keppnisdegi þegar hann kom inn á 67 höggum og endaði mótið með. Úrslit íslensku kylfinganna: T6. Dagbjartur Sigurbrandsson, 71-69-70-69 (-9) T11. Sigurður Arnar Garðarsson, 71-70-73-68 (-6) T14. Ragnar Garðarsson, 73-67-73-70 (-5) 29. Aron Snær Júlíusson, 69-71-75-72 (-1) T36. Logi Sigurðsson, 74-72-74-69 (+1) T40. Tómas Eiríksson Hjaltested, 75-74-71-70 (+2) T54. Hlynur Bergsson, 76-72-73-73 (+6) T58. Jóhann Frank Halldórsson, 72-74-76-74 (+8) Aron var næstur því að komast áfram en hann endaði í 29. sæti á einu höggi undir pari. Finninn Miikka Mäkinen sigraði mótið á 15 höggum undir pari. Hann lék lokahringinn á 66 höggum og vann með þriggja högga mun. Annað stig úrtökumótanna fer fram dagana 29. október til 1. nóvember á fjórum völlum á Spáni. Þar leika Dagbjartur, Sigurður Arnar og Ragnar um sæti á lokastiginu, sem fer fram á INFINITUM Golf í Tarragona dagana 6.-11. nóvember. Á lokastiginu verða leiknir sex hringir og fá 15 efstu kylfingarnir keppnisrétt á DP World Tour fyrir tímabilið 2027. Lokastaða mótsins

Fjórir íslenskir kylfingar eru á meðal 20 efstu eftir tvo hringi á fyrsta stigi úrtökumóta fyrir DP World Tour. Aron Snær Júlíusson, Dagbjartur Sigurbrandsson og Ragnar Már Garðarsson eru jafnir í 11. sæti en Sigurður Arnar Garðarsson er jafn í 16. sæti. Mótið fer fram á Golf-und Country Club Seddiner See í Þýskalandi og verða leiknir fjórir hringir. Alls eru átta íslenskir kylfingar meðal 82 keppenda, en einungis efstu nítján komast áfram á næsta stig. Ragnar átti besta hring Íslendinganna á öðrum keppnisdegi þegar hann lék á 67 höggum, fimm höggum undir pari. Hann er, ásamt Dagbjarti og Aroni á fjórum höggum undir pari í mótinu. Aron Snær náði þeim magnaða árangri að fá albatross á þrettándu holu vallarins á öðrum hring. Hann lék par fimm holuna því á tveimur höggum eða þremur undir pari. Sigurður Arnar er höggi á eftir þremeningunum og hefur leikið hringina tvo á 71 og 70 höggum. Á fyrsta hring mótsins fékk Sigurður holu í höggi á sautjándu braut vallarins. Magnað afrek. Staða íslensku kylfinganna eftir tvo hringi T11. Aron Snær Júlíusson, 69-71 (-4) T11. Dagbjartur Sigurbrandsson, 71-69 (-4) T11. Ragnar Már Garðarsson, 73-67 (-4) T16. Sigurður Arnar Garðarsson, 71-70 (-3) T47. Jóhann Frank Halldórsson, 72-74 (+2) T47. Logi Sigurðsson, 74-72 (+2) T57. Hlynur Bergsson, 76-72 (+4) T60. Tómas Eiríksson Hjaltested, 75-74 (+5) Þjóðverjinn Martin Gründemann er í forystu á tíu höggum undir pari, einu höggi á undan Taylor Paul frá Englandi.  Staða mótsins

Íslenska 75+ landsliðið stóð sig með mikilli prýði á móti sem fram fór í Burgauberg-Neudauberg í Austurríki. Það tóku 20 þjóðir þátt í mótinu. Íslanska liðið hafnaði í 4. sæti í betri bolta með forgjöf og í 12. sæti án forgjafar . Spennan var mikil allt fram á síðasta keppnisdag, en þá var íslenska liðið í baráttu um sjálft 1. sætið. Aðstæður reyndu verulega á keppendur, enda fór hitinn yfir 35 gráður á lokadeginum - ekki alveg hitastigið sem við Íslendingar venjumst hér heima. Liðið skipuðu þeir: Axel Alfreðsson Gunnsteinn Skúlason Hans Óskar Iseban Helgi Hólm Tryggvi Þór Tryggvason Þórhallur Sigurðsson Liðsstjóri íslenska liðsins var Sigurjón Árni Ólafsson . Helgi, sem er 85 ára, var jafnframt næstelsti keppandi mótsins! Við óskum þeim öllum innilega til hamingju með frábæran árangur og glæsilega frammistöðu í Austurríki!

Átta íslenskir kylfingar hefja leik þriðjudaginn 8. september á fyrsta stigi úrtökumóta fyrir DP World Tour. Mótið fer fram á Golf-und Country Club Seddiner See í Michendorf í Þýskalandi og stendur yfir í fjóra daga. Íslensku kylfingarnir sem eru á meðal keppenda eru: Aron Snær Júlíusson Dagbjartur Sigurbrandsson Hlynur Bergsson Logi Sigurðsson Ragnar Garðarsson Sigurður Arnar Garðarsson Jóhann Frank Halldórsson Tómas Eiríksson Hjaltested Alls eru 84 kylfingar frá 27 þjóðum skráðir til leiks. Átta manna hópur Íslands er því einn sá fjölmennasti í mótinu, en aðeins Bandaríkin eiga fleiri keppendur. Á meðal þekktra kylfinga í mótinu eru Bandaríkjamaðurinn Michael La Sasso og Japaninn Yosuke Asaji, sem léku báðir á LIV-mótaröðinni á árinu. Fjögurra daga höggleikur Leiknar verða 72 holur í höggleik dagana 8.-11. september. Fjöldi þeirra sem kemst áfram á næsta stig er ákveðinn fyrir hvert mót út frá stærð þátttakendahópsins og komast kylfingar sem eru jafnir í síðasta örugga sætinu einnig áfram. Mótið í Þýskalandi er eitt af tíu mótum á fyrsta stigi úrtökukeppninnar. Þau fara fram víðs vegar um Evrópu þessa dagana. Leikið á Suðurvellinum Mótið fer fram á Suðurvelli Golf-und Country Club Seddiner See. Völlurinn var hannaður af hinum þekkta bandaríska golfvallahönnuði Robert Trent Jones Jr. og var opnaður árið 1997. Suðurvöllurinn er par 72 og er 6.486 metra langur. Hann hefur áður verið notaður í stór alþjóðleg mót, þar á meðal á Ladies European Tour, síðast árið 2024. Svona virka úrtökumót DP World Tour Úrtökukeppnin, sem oftast er kölluð Q-School, skiptist í þrjú stig. Kylfingur sem hefur leik á fyrsta stigi getur leikið allt að 252 holur á leið sinni að mótaröðinni. Fyrsta stigið samanstendur af tíu 72 holu mótum. Þeir kylfingar sem komast áfram leika á öðru stigi, sem fer fram á fjórum völlum á Spáni dagana 29. október til 1. nóvember. Þar verða einnig leiknar 72 holur og ákveðinn fjöldi efstu kylfinga á hverjum velli tryggir sér sæti á lokastiginu. Lokastigið fer fram á INFINITUM Golf í Tarragona á Spáni dagana 6.-11. nóvember. Þar mæta 156 kylfingar til leiks og leika sex hringi. Eftir fyrstu fjóra hringina verður keppendahópurinn skorinn niður áður en lokahringirnir tveir fara fram. Að loknu lokastiginu fá 15 efstu kylfingarnir og þeir sem eru jafnir í 15. sæti keppnisréttindi á DP World Tour fyrir tímabilið 2027 ásamt fullum keppnisrétti á HotelPlanner Tour. Rástímar okkar kylfinga má sjá hér að neðan – allir eru þeir að staðartíma í Þýskalandi: Ragnar Garðarsson – 08:40 af 1. teig Sigurður Arnar Garðarsson – 08:50 af 10. teig Aron Snær Júlíusson – 09:00 af 1. teig Jóhann Frank Halldórsson – 09:20 af 10. teig Logi Sigurðsson – 09:30 af 1. teig Dagbjartur Sigurbrandsson – 10:20 af 10. teig Hlynur Bergsson – 10:30 af 1. teig Tómas Eiríksson Hjaltested – 10:30 af 10. teig  Rástímar, staða og úrslit mótsins

66°Norður mótinu á Urriðavelli lauk í dag, sunnudaginn 6. september. Mótið var síðasta mót ársins á Golf 14 mótaröðinni. Keppt var í fjórum flokkum og leiknar 36 holur í höggleik án forgjafar, 18 holur hvorn keppnisdag. Alls voru 124 kylfingar skráðir til leiks. Ásgeir Páll sigraði með eins höggs mun Mikil spenna var í flokki 14 ára og yngri drengja. Ásgeir Páll Baldursson úr Golfklúbbi Mosfellsbæjar og Jón Ómar Sveinsson úr Golfklúbbnum Keili léku fyrsta hringinn báðir á 71 höggi. Ásgeir lék lokahringinn á 75 höggum og lauk leik á fjórum höggum yfir pari. Jón Ómar endaði einu höggi á eftir, en hann lék lokahringinn á 76 höggum. Emil Darri Birgisson úr Golfklúbbi Mosfellsbæjar varð þriðji á 149 höggum, sjö yfir pari. Elísabet Þóra best í flokki 14 ára og yngri Elísabet Þóra Ólafsdóttir úr Nesklúbbnum sigraði í flokki 14 ára og yngri stúlkna. Hún lék hringina tvo á 79 og 80 höggum og lauk leik á sautján höggum yfir pari. Emilía Sif Ingvarsdóttir úr Golfklúbbnum Oddi varð önnur og Embla Sigrún Arnsteinsdóttir úr Golfklúbbi Akureyrar þriðja. Eiríkur Bogi og Styrmir jafnir eftir 36 holur Eiríkur Bogi Karlsson úr Golfklúbbi Kópavogs og Garðabæjar stóð uppi sem sigurvegari í flokki 12 ára og yngri drengja. Eiríkur og Styrmir Ragnarsson úr Golfklúbbi Reykjavíkur léku mótið báðir á tólf höggum yfir pari. Eiríkur lék hringina á 76 og 78 höggum en Styrmir á 82 og 72 höggum. Eiríkur tryggði sér sigurinn í bráðabana. Jón Agnar Magnússon úr Nesklúbbnum og Ísak Hrafn Jónasson úr Golfklúbbi Reykjavíkur deildu þriðja sætinu. Ásta Sigríður sigraði með þriggja högga mun Ásta Sigríður Egilsdóttir úr Golfklúbbnum Oddi sigraði í flokki 12 ára og yngri stúlkna. Hún lék hringina á 81 og 79 höggum og lauk leik á átján höggum yfir pari. Edda María Hjaltadóttir úr Golfklúbbi Kópavogs og Garðabæjar varð önnur og Arna Dís Hallsdóttir, einnig úr GKG, varð þriðja.  Öll úrslit 66°Norður mótsins má finna hé r

66°Norður mótinu á Ljúflingi lauk í dag, sunnudaginn 6. september. Mótið var síðasta mót ársins á frábæru Golf 14 tímabili. Alls tóku 55 kylfingar þátt og var keppt í sex flokkum. Leiknar voru níu holur hvorn keppnisdag, samtals 18 holur, í höggleiksafbrigði án forgjafar þar sem hámarksskor á hverri holu var tíu högg. Mótið var ætlað kylfingum með 36,1 eða hærri forgjöf og var áhersla lögð á að öðlast reynslu af mótahaldi, læra leikinn og hafa gaman. Gunnar Erlingur Hákonarson úr Golfklúbbi Þorlákshafnar sigraði í flokki 10 ára og yngri drengja. Hann lék hringina tvo á 70 höggum og bætti sig um sex högg á milli daga, úr 38 höggum í 32. Darri Þór Tómasson úr Golfklúbbi Suðurnesja varð annar á 74 höggum og Edvard Aron Magnússon úr Golfklúbbi Mosfellsbæjar þriðji á 77 höggum. Í flokki 10 ára og yngri stúlkna vann Edda Elmarsdóttir úr Golfklúbbi Kópavogs og Garðabæjar á 77 höggum. Hrafnhildur Rún Björnsdóttir úr Golfklúbbi Mosfellsbæjar varð önnur á 81 höggi og Anna Lind Valdimarsdóttir úr Golfklúbbi Reykjavíkur þriðja á 88 höggum. Aðalsteinn Kjaran Egilsson úr GKG sigraði í flokki 12 ára og yngri drengja á 76 höggum. Klúbbfélagar hans, Steindór Óli Ómarsson og Arnar Rósenkranz Þórðarson, deildu öðru sætinu á 79 höggum. Í flokki 12 ára og yngri stúlkna sigraði Elísa Bríet Róbertsdóttir úr Golfklúbbi Mosfellsbæjar á 76 höggum. Iðunn Jóhanna Frostadóttir úr Golfklúbbi Reykjavíkur varð önnur á 81 höggi og Þórunn Emma McGinley úr Golfklúbbnum Keili þriðja á 82 höggum. Aron Logi Baldursson úr Golfklúbbi Reykjavíkur sigraði í flokki 14 ára og yngri drengja á 76 höggum. Kristófer Jens K. Sandholt úr Golfklúbbi Mosfellsbæjar varð annar á 78 höggum og Sævar Hrafn Garðarsson úr GR þriðji á 79 höggum. Anna Dís Strange úr Golfklúbbi Mosfellsbæjar sigraði í flokki 14 ára og yngri stúlkna á 82 höggum. Eygló Rún Ingadóttir, einnig úr GM, varð önnur á 84 höggum og Alexandra Fenger úr Golfklúbbnum Oddi þriðja á 94 höggum. Smelltu hér til að skoða öll úrslit mótsins . * Fréttin verður uppfærð með myndum um leið og þær berast

Íslenska 50+ karlalandsliðið í golfi stóð uppi sem sigurvegari á Evrópumóti landsliða í 2. deild sem lauk í dag á Sedin Golf Resort í Slóvakíu. Ísland hafði mikla yfirburði í mótinu og tryggði sér um leið sæti í efstu deild Evrópumótsins á næsta ári. Ísland lék hringina þrjá á samtals 672 höggum, eða 15 höggum yfir pari. Liðið sigraði með 23 högga mun en heimamenn í Slóvakíu urðu í öðru sæti á +38. Íslenska liðið var í efsta sæti eftir fyrsta hringinn og jók forskot sitt verulega á öðrum keppnisdegi. Heildarskor Íslands á hringjunum þremur var 232, 218 og 222 högg. Þrjú bestu skor liðsins töldu á hverjum hring. Á lokahringnum léku Jón Snorri Halldórsson og Sigurbjörn Þorgeirsson báðir á 73 höggum, eða pari vallarins. Frans Páll Sigurðsson lék á 76 höggum og töldu þessi þrjú skor fyrir Ísland. Siggeir Vilhjálmsson lék lokahringinn á 80 höggum. Sigurbjörn Þorgeirsson vann jafnframt einstaklingskeppni mótsins. Hann lék hringina þrjá á 77, 70 og 73 höggum og lauk keppni á 220 höggum, einu höggi yfir pari. Sigurbjörn sigraði með fjögurra högga mun. Jón Snorri Halldórsson varð einnig á meðal efstu manna og lauk keppni í þriðja sæti á sex höggum yfir pari. Frans Páll Sigurðsson varð sjötti á átta yfir pari og Siggeir Vilhjálmsson endaði jafn í 13. sæti á sautján yfir pari. Mótið var haldið dagana 1.-3. september og var þetta fyrsta Evrópumót 50+ karlalandsliða í 2. deild. Ísland skrifaði því nafn sitt í sögubækurnar sem fyrsti sigurvegari mótsins.  Heildarúrslit mótsins má nálgast hér

50+ kvennalandslið Íslands hefur leik á Evrópumóti landsliða í golfi í dag, þriðjudaginn 1. september. Mótið fer fram á BlackSeaRama Golf Resort í Búlgaríu dagana 1.-5. september. Íslenska liðið keppir í efstu deild mótsins ásamt 15 öðrum þjóðum. Fyrir Íslands hönd leika: Ragnheiður Sigurðardóttir Þórdís Geirsdóttir Steinunn Sæmundsdóttir Lilja Karlsdóttir Helga Þorvaldsdóttir Sigríður Kristinsdóttir Auk Íslands taka Austurríki, Belgía, England, Finnland, Frakkland, Þýskaland, Írland, Ítalía, Holland, Noregur, Portúgal, Skotland, Spánn, Svíþjóð og Sviss þátt. Sex kylfingar skipa hvert lið. Fyrstu tvo keppnisdagana er leikinn höggleikur þar sem fimm bestu skor hvers liðs telja á hvorum hring. Samanlögð úrslit höggleiksins ráða því í hvaða riðli liðin leika þegar holukeppnin hefst á þriðja keppnisdegi. Átta efstu liðin eftir höggleikinn komast í A-riðil og leika um Evrópumeistaratitilinn. Liðin í sætum 9-16 fara í B-riðil og leika um neðri sæti mótsins. Í hverri viðureign holukeppninnar er leikinn einn fjórmenningsleikur og fjórir tvímenningsleikir.  Holukeppnin stendur yfir í þrjá daga og lýkur mótinu laugardaginn 5. september. Tvö neðstu liðin leika í 2. deild árið 2027. Evrópumót 50+ kvennalandsliða var fyrst haldið árið 2006 og fer nú fram í 20. sinn. England hefur titil að verja eftir sigur á mótinu á Spáni árið 2025. Hægt verður að fylgjast með rástímum, stöðu og úrslitum íslenska liðsins á mótssíðu Evrópska golfsambandsins .